Nakakapangilabot ang video footage na kuha sa dash cam ng ambulansya ng LGU Gubat, Sorsogon kung saan kitang-kita kung paano ito sinalpok ng rumaragasang ten-wheeler delivery truck sa Quirino Highway, Tagkawayan, Quezon.
Ayon sa ulat ng Tagkawayan police, biyahe papuntang Naga City umano ang truck habang galing sa Gubat, Sorsogon ang ambulansiya at magdadala sana ng pasyente sa Maynila.
Tinatahak ng ambulansiya ang Quirino Highway sa Barangay San Vicente, Tagkawayan bandang alas-9 ng umaga ng bigla itong sinalubong ng rumaragasang 10-wheeler wing truck.
Panoorin ang Dashcam video:
Like 
on Facebook
Sa lakas ng pagkakabangga, nakaladkad ang ambulansiya bago sumalpok ang truck sa isa pang nakaparadang van.
Dead-on the spot ang ambulance driver na si Melchor Escandor, pasyenteng si Jocelyn Esadero, at isang Zander Regalado.
Binawian naman ng buhay habang nilalapatan ng lunas sa Eleazar Memorial District Hospital sa Tagkawayan ang 12 anyos na sakay rin ng ambulansya.
Kabilang naman sa mga malubhang nasugatan sina Rose Ann Espineda, Lanie Escandor, at ang 8 anyos na si Nigel Gime.
Nasa kustodiya na ng Tagkawayan MPS ang kaskaserong driver ng truck na taga-Calabanga, Camarines Sur.
Nawalan umano ng kontrol sa manibela ang truck driver dahil sa madulas na kalsada, ayon sa imbestigasyon ng pulisya.
Batay sa naunang interview bago pa man lumabas ang dashcam video. Nauna nang sinabi ng driver ng truck na siya umano ang sinalubong ng ambulansya.
Mahaharap ang driver sa kasong reckless imprudence resulting in multiple homicide, multiple physical injuries at damage to properties.
